O‘zbekistonda xalqaro akkreditatsiyadan o‘tgan ilk “Halol” markazi ochildi
Yangi tashkilot Turkiyaning “Halal Accreditation Agency” agentligi tomonidan xalqaro akkreditatsiyadan o‘tgan.
O‘zbekistonda ilk bor xalqaro “Halol” akkreditatsiyasiga ega sertifikatlash organi ish boshladi. Bu haqda O‘zbekiston ilmiy-sinov va sifat nazorati markazi matbuot xizmati xabar berdi.
Yangi tashkilot markaz huzurida tuzilgan bo‘lib, Turkiyaning Halal Accreditation Agency (HAK) tomonidan xalqaro talablarga javob beruvchi organ sifatida akkreditatsiyadan o‘tgan. Mazkur yutuq O‘zbekiston korxonalari uchun xalqaro “halol” standartlari bo‘yicha mahsulot ishlab chiqish va eksportni kengaytirish yo‘lida muhim qadam sifatida baholanmoqda.
Mutaxassislarning ta’kidlashicha, endilikda mahalliy ishlab chiqaruvchilar xorijiy, ayniqsa, Islom mamlakatlari bozorlariga chiqishda xalqaro miqyosda tan olingan “halol” sertifikatini olish imkoniga ega bo‘ladi. Bu esa O‘zbekiston mahsulotlariga bo‘lgan ishonchni oshiradi va eksport hajmini ko‘paytiradi.
Ma’lumotlarga ko‘ra, global “halol” oziq-ovqat bozori hajmi 2 trillion AQSh dollaridan ortiqni, “halol” turizm sektori esa 400 milliard dollarni tashkil etmoqda. Shu bois, O‘zbekistonning ushbu tizimda ishtiroki mamlakat iqtisodiyotining yangi eksport yo‘nalishlarini ochib berishi kutilmoqda.
