Toshkentda qarovsiz go‘dakni qutqarib qolgan talaba taqdirlandi
Oliy taʼlim vaziri, hokim va FVB boshlig‘i unga minnatdorchilik bildirdi.
Avvalroq Toshkent shahrining Yangihayot tumanida 4-qavatdan tushib ketishi mumkin bo‘lgan bolani 5-qavatda yashovchi talaba yigit qutqarib qolgani haqida xabar bergan edik.
Maʼlum bo‘lishicha, yigit Toshkent kimyo-texnologiya instituti talabasi Muhriddin Ilashov bo‘lib, u Oliy taʼlim, fan va innovatsiyalar vaziri Qo‘ng‘irotboy Sharipov tomonidan taqdirlandi.
Vazir Muhriddin Ilashovga uning mardligi va fidoyiligini eʼtirof etib, tashakkurnoma hamda esdalik sovg‘asini topshirgan.
Shuningdek, Yangihayot tumani hokimi hamda tuman Favqulodda vaziyatlar bo‘limi boshlig‘i ham Muhriddin Ilashov bilan uchrashib, uning mardligi va fidoyiligini yuksak eʼtirof etishdi. Uchrashuv davomida talaba yigitga tashakkurnoma va esdalik sovg‘asi topshirildi.
“Tuman hokimi Muhriddinni ana shunday mard, jasur va fidoiy farzand qilib voyaga yetkazgan ota-onasiga chuqur minnatdorchilik bildirdi”, deyiladi hokimlik Telegram kanalida.
