Shavkat Mirziyoyev 24-oktyabrda Bryusselga tashrif buyuradi
Tashrif davomida O‘zbekiston va Yevropa Ittifoqi o‘rtasida Kengaytirilgan sheriklik va hamkorlik to‘g‘risida bitim imzolanadi.
Joriy yilning 23-24 oktyabr kunlari Prezident Shavkat Mirziyoyev rasmiy tashrif bilan Belgiyaga boradi. Bu haqida “Zamon.uz” manbasi xabar berdi.
Bu tashrif — O‘zbekiston va Yevropa Ittifoqi munosabatlarida yangi bosqichni belgilaydigan muhim voqea bo‘lishi kutilmoqda.
Taʼkidlanishicha, Bryusseldagi muzokaralar siyosiy muloqotni chuqurlashtirish, iqtisodiy hamkorlikni yangi formatda yo‘lga qo‘yish va “kengaytirilgan sheriklik va hamkorlik to‘g‘risidagi bitim”ni amaliy mazmun bilan to‘ldirishga qaratilgan bo‘ladi.
2024 yilda O‘zbekiston va Yevropa mamlakatlari o‘rtasidagi tovar aylanmasi 6,4 mlrd dollarga yetdi. Yevropa kompaniyalari ishtirokidagi investitsiya loyihalarining umumiy qiymati 30 mlrd yevroga yaqinlashdi.
Tashrif doirasida yangi sanoat, “yashil energetika”, raqamli iqtisodiyot va taʼlim sohasidagi qo‘shma loyihalar muhokama qilinishi kutilmoqda.
