Toshkentda Cobaltga urilgan Lacetti butunlay yonib ketdi
Hodisa oqibatida haydovchilardan biriga tibbiy yordam ko‘rsatilgan.
Ijtimoiy tarmoqlarda Toshkent shahrining Chilonzor tumanida Lacetti yonayotgani aytilgan videolar tarqalgandi. Holat yuzasidan shahar IIB YHXB rasmiy maʼlumot berdi.
Qayd etilishicha, hodisa 21-oktyabr kuni soat 00:10 larda Chilonzor tumani Bunyodkor shohko‘chasida yuz bergan. Unda Lacetti va Cobalt rusumli avtomashinalari o‘zaro to‘qnashishi oqibatida yo‘l transport hodisasi sodir bo‘lgan. To‘qnashuvdan so‘ng Lacetti avtomashinasida yong‘in yuzaga kelgan.
Shahar FVBga ko‘ra, yong‘in-qutqaruv texnikalari aytilgan manzilga soat 00:22 da yetib borib, yong‘in soat 00:29 da o‘chirilgan. Yong‘in oqibatida jarohat olganlar yo‘q.
YTH natijasida Cobalt avtomashina yo‘lovchisiga birinchi tez tibbiy yordam ko‘rsatilgan.
Mazkur holat yuzasidan Toshkent shahar IIBB YHXB hamda FVB masʼul xodimlari tomonidan surishtiruv ishlari olib borilmoqda.
