Toshkentda 29 yoshli haydovchi 60 yoshli erkakni kaltakladi
Jabrlanuvchida yopiq bosh miya jarohati va miya chayqalishi aniqlangan.
Toshkent shahrining Yakkasaroy tumanida 29 yoshli haydovchi 60 yoshli erkakka tan jarohati yetkazgani uchun unga nisbatan jinoyat ishi qo‘zg‘atildi.
Ichki ishlar organlari ma’lumotiga ko‘ra, voqea 19-oktabr kuni soat 20:00 atrofida Yusuf Xos Xojib ko‘chasida sodir bo‘lgan. “Nexia-2” rusumli avtomobil haydovchisi bilan keksa erkak o‘rtasida kelishmovchilik yuzaga kelgan, natijada haydovchi erkakka jismoniy kuch ishlatib, voqea joyidan yashiringan.
Tibbiy ko‘rik yakunlariga ko‘ra, jabrlanuvchida yopiq bosh miya jarohati, miya chayqalishi va qosh sohasida tan jarohati aniqlangan.
Mazkur holat yuzasidan Jinoyat kodeksining 277-moddasi (bezorilik) bo‘yicha jinoiy ish ochilgan, hozirda tergov harakatlari olib borilmoqda.
