Toshkentda jurnalistlar kuch bilan IIBga olib ketilgani aytilmoqda
Holat yuzasidan vazirlik matbuot xizmati izoh berdi.
Toshkent shahri IIBB axborot xizmati xabariga ko‘ra, ijtimoiy tarmoqlarda “Taftish.uz” internet nashri muxbirlari bilan bog‘liq voqea bo‘yicha tarqatilayotgan ayrim xabarlar asossizdir.
23-oktabr kuni Yunusobod tumani prokuraturasi tomonidan o‘tkazilgan sayyor qabul chog‘ida mazkur nashr vakillari hamda qabulga kelgan ayrim fuqarolar o‘rtasida kelishmovchilik yuzaga kelgan.
Holat bo‘yicha fuqarolarning 102 qisqa raqamiga qilgan murojaati asosida voqea joyiga yetib borgan ichki ishlar xodimlari vaziyatni aniqlashtirish maqsadida tomonlarni tuman IIB binosiga olib borib, suhbat o‘tkazgan.
Hozirda mazkur holat yuzasidan o‘rganish ishlari davom etmoqda.
Ichki ishlar organlari bildirishicha, ularning harakatlari qonuniy huquqiy tartibda, jamoat joyida yuzaga kelgan mojaroning sabablari va ishtirokchilarini aniqlashga qaratilgan bo‘lib, OAV vakillarining faoliyatiga to‘sqinlik qilish bilan hech qanday aloqasi yo‘q.
Tegishli idora “Taftish.uz” nashriga jamoatchilikni chalg‘ituvchi, “jurnalistlarga suiqasd”, “zo‘ravonlik ishlatildi”, “asossiz olib ketildi”, “uskunalar shikastlandi” kabi asossiz ma’lumotlarni tarqatmaslikni so‘rab murojaat qilgan.
Avvalroq Taftishuz internet nashri jurnalistlari IIBga olib ketilgani haqida xabarlar tarqalgandi.
