Davlat kam ta’minlangan oilalarning xususiy bog‘cha to‘lovlarining 40 foizini qoplaydi
Mablag‘lar bevosita xususiy oilaviy bog‘chalarga o‘tkaziladi.
O‘zbekistonda kam ta’minlangan oilalarning farzandlari xususiy maktabgacha ta’lim muassasalariga qatnaganda, davlat ularning to‘lov xarajatlarini qisman qoplab beradi. Bu tartib Adliya vazirligida 2025-yil 23-oktabr kuni 3693-son bilan ro‘yxatdan o‘tgan yangi nizomda belgilab qo‘yildi.
Yangi tizimga ko‘ra, kompensatsiya miqdori davlat bolalar bog‘chalarida to‘lanadigan to‘qqiz soatlik kunlik to‘lov miqdorining 40 foizini tashkil etadi. Ushbu mablag‘lar to‘g‘ridan-to‘g‘ri kam ta’minlangan oilalar farzandlarini qabul qilgan xususiy oilaviy bog‘chalarga yo‘naltiriladi.
Kompensatsiya oluvchi oilalar ro‘yxati maxsus axborot tizimi orqali avtomatik shakllantiriladi, bu esa jarayonning shaffof va tezkor bo‘lishini ta’minlaydi.
Shuningdek, xususiy bog‘chalar uchun ajratiladigan bunday joylar soni ularning Maktabgacha va maktab ta’limi vazirligi bilan tuzilgan shartnomasidagi umumiy qabul kvotasining 15 foizidan oshmasligi belgilangan.
