Ilon Mask million kishilik robotlar armiyasini yaratmoqchi
“Optimus” robotining dastlabki ishlab chiqarish modeli 2026-yil fevral–mart oylarida taqdim etilishi rejalashtirilgan.
Amerikalik tadbirkor Ilon Mask “Tesla” kompaniyasi tomonidan ishlab chiqilayotgan “Optimus” nomli insonsimon robotlardan iborat millionlik armiyani yaratish rejasini e’lon qildi. Bu haqda Wired nashri xabar berdi.
Maskning so‘zlariga ko‘ra, “Optimus” robotining ishlab chiqarish uchun mo‘ljallangan prototipi 2026-yilning fevral yoki mart oylarida tayyor bo‘ladi. “Tesla” keyingi yil oxirigacha to‘liq hajmda ishlab chiqarishni boshlashni rejalashtirgan. Kompaniya umumiy hisobda bir millionta robot ishlab chiqarmoqchi.
Tadbirkor sarmoyadorlar bilan uchrashuv chog‘ida bu loyihaning miqyosini tan olarkan, robotlar armiyasi ustidan nazorat masalasiga ham to‘xtaldi.
“Agar men bu jarayon ustidan yetarli darajada ta’sir o‘tkaza olmasam, robotlar armiyasini yaratish menga qulay bo‘lmaydi”, — degan Mask.
Ekspertlar “Optimus” loyihasini sun’iy intellekt va avtomatlashtirilgan mehnat tizimlari rivojida yangi bosqich sifatida baholamoqda.
