“Juda ham tushunarsiz holat bo‘lgan”
MB raisi O‘zbekiston Rossiyadan oltin sotib olayotgani haqidagi xabarlarga izoh berdi.
Avvalroq ijtimoiy tarmoqlarda O‘zbekiston Rossiyadan oltin sotib olayotgani haqida xabarlar tarqalgandi. Bunga 24 oktyabr kuni Markaziy bankda bo‘lib o‘tgan matbuot anjumanida regulyator rahbari Timur Ishmetov munosabat bildirdi.
Uning so‘zlariga ko‘ra, bu umuman haqiqatdan yiroq maʼlumot.
“Biz hech qachon boshqa davlatlardan oltin sotib olmaganmiz va sotib olish niyatimiz yo‘q. O‘zimizga yetadigan oltinimiz bor”, dedi Ishmetov.
MB raisi The Economist jurnalida chop etilgan maqolani eslab, mazkur nashr bilan rasmiy muloqot bo‘lganini maʼlum qildi.
“Bir necha oy avval The Economist jurnalidagi maqolada shunday maʼlumot chiqdi. Biz ularga rasmiy murojaat yo‘llab, maʼlumot qayerdan olingani bo‘yicha savol qo‘ydik va noto‘g‘riligini ko‘rsatdik. Ular keyingi sonida xatosini tuzatdi. Juda ham tushunarsiz holat bo‘lgan”, - dedi u.
