O‘zbekistonlik uch nafar muhojir Rossiyadan chiqarib yuborildi
Ular qalbaki mehnat shartnomalari asosida rasmiylashtirilgan.
Rossiyaning Norilsk shahrida noqonuniy yashagan uch nafar o‘zbekistonlik fuqarolar deportatsiya qilindi.
Ma’lumotlarga ko‘ra, Norilskdagi “Plov House Elite” kafelar tarmog‘i O‘zbekistondan oshpazlarni yollab, ularni barjada noqonuniy olib o‘tgan, qalbaki mehnat shartnomalari tuzib, ro‘yxatdan o‘tkazish uchun soxta hujjatlar bilan rasmiylashtirgan.
O‘zbekistonning Novosibirskdagi Bosh konsulligi xabariga ko‘ra, ular 22-oktyabr kuni qo‘lga olingan. Ularning hibsga olinishi Norilsk shahri chet el fuqarolari uchun kirish taqiqlangan hudud bo‘lganligi bilan bog‘liq. Shahar hududida ishlash va yashash faqat Rossiya Federal Xavfsizlik Xizmati (FSB) ruxsati bilan amalga oshiriladi.
Migrantlarni noqonuniy ishga joylashtirish va qonuniylashtirishga aloqador shaxslarga nisbatan jinoiy ish ochilgan. Hozirgacha sakkiz nafar gumonlanuvchi hibsga olingan bo‘lib, jinoyatning boshqa ishtirokchilari aniqlanmoqda.
O‘zbekistonlik uch nafar fuqaroga ma’muriy javobgarlik qo‘llanib, ular Rossiyadan chiqarib yuborildi.
