Rossiyadan og‘ir ahvolga tushgan yetti farzandli o‘zbekistonlik ayol Vatanga qaytarildi
Ayol hujjatlarsiz yashab kelgani uchun mahalliy politsiya tomonidan qo‘lga olingan.
Rossiyaning Samara viloyatida og‘ir ahvolga tushib qolgan O‘zbekiston fuqarosi va uning yetti nafar farzandiga mamlakatimizning Rossiyadagi Bosh konsulligi tomonidan amaliy yordam ko‘rsatildi.
Bosh konsullik ma’lumotiga ko‘ra, ayol shaxsini tasdiqlovchi hujjatlarsiz yashab kelgani sababli mahalliy politsiya tomonidan qo‘lga olingan. U xorijiy fuqarolarni vaqtincha saqlash markaziga joylashtirilgan, farzandlari esa voyaga yetmaganlar uchun mo‘ljallangan muassasaga topshirilgan.
Diplomatik vakolatxona xodimlari Samara viloyatidagi tegishli idoralar bilan muzokaralar olib borib, ona va farzandlarini birlashtirish hamda ularni vatanga qaytarish bo‘yicha kelishuvga erishdi.
Natijada oila Samara–Toshkent yo‘nalishi bo‘yicha aviareysda O‘zbekistonga qaytarildi.
Bundan avval ham Olmaotada qarovsiz qolgan besh nafar o‘zbekistonlik bola diplomatik yordam orqali yurtga olib kelingan edi.
