Jami 11 kg: Uchta viloyatda narkotik savdosi fosh bo‘ldi
DXX giyohvandlik vositalari savdosi bilan shug‘ullangan shaxslarni qo‘lga oldi.
Samarqand, Surxondaryo va Xorazm viloyatlarida jami 11 kilogrammdan ortiq narkotik moddalar ashyoviy dalil sifatida olindi. Bu haqida DXX Zamon.uz‘ga maʼlum qildi.
Bildirilishicha, Samarqand viloyati Urgut tumanida yashovchi shaxs belgilangan tartibni buzib, aylanma yo‘llar orqali Tojikiston Respublikasidan 8 kg 860 gr “opiy” moddasini kontrabanda yo‘li bilan mamlakat hududiga olib o‘tgan vaqtida “o‘zbek-tojik” davlat chegarasini qo‘riqlayotgan DXX Chegara qo‘shinlari harbiy xizmatchilarining to‘xtash haqidagi qonuniy talabiga bo‘ysunmasdan, giyohvandlik vositasini tashlab, nomaʼlum tomonga qochgan.
Ko‘rilgan tezkor chora-tadbirlar natijasida og‘ufurush qo‘lga olingan.
Tergovga qadar tekshiruv davomida Urgut tumanida yashovchi shaxs uning jinoiy sherigi ekanligi aniqlanib, protsessual tartibda ushlangan.
Surxondaryo viloyatida qayd etilgan holatda Denov tumanida yashovchi, muqaddam giyohvandlik vositalari savdosi bilan bog‘liq jinoyati uchun sudlangan shaxs Davlat xavfsizlik xizmati va Ichki ishlar organlari xodimlari tomonidan tekshirilganda uning yonida 31 gr “opiy” moddasi borligi maʼlum bo‘lgan.
Shundan so‘ng u ajal og‘usini Denov tumanida istiqomat qiluvchi fuqarodan sotib olganligi aniqlanib, mazkur narkosavdogarning yashash xonadonidan ham 1 kg 483 gr “opiy” moddasi ashyoviy dalil sifatida olingan.
Xorazm viloyatida kuzatilgan holatda Gurlan tumanida yashovchi, muqaddam giyohvandlik vositalari savdosi bilan bog‘liq jinoyati uchun ikki marotaba sudlangan shaxs 877 gr “gashish” moddasini xaridorga 14 ming AQSH dollariga sotgan vaqtida qo‘lga olingan.
Aniqlanishicha, ushbu giyohvandlik vositasi tojikistonlik narkokuryerlar tomonidan aylanma yo‘llar orqali olib kelingan.
Hozirda mazkur shaxslarning barchasiga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, “qamoq” ehtiyot chorasi qo‘llanildi.
