O‘zbekistonda Kasbiy ta’lim agentligi tashkil etildi
Agentlik texnikumlar faoliyatini va kasb-hunar ta’limi dasturlarini boshqaradi.
O‘zbekiston Respublikasi Prezidenti tomonidan imzolangan qarorga muvofiq, Oliy ta’lim, fan va innovatsiyalar vazirligi huzurida Kasbiy ta’lim agentligi tashkil etildi. Yangi tuzilma mamlakatda kasb-hunar ta’limi tizimini takomillashtirish, texnikumlar faoliyatini muvofiqlashtirish hamda zamonaviy mehnat bozori talablariga mos malakali mutaxassislar tayyorlashni maqsad qilgan.
Agentlik zimmasiga kasbiy ta’lim dasturlarining mazmunini ishlab chiqish, malaka darajalari va o‘qish muddatlarini belgilash, bitiruvchilar bilimini baholash mezonlarini shakllantirish, shuningdek, o‘quv-uslubiy ta’minot bo‘yicha yagona standartlarni joriy etish vazifalari yuklatildi.
Qarorga ko‘ra, hududlarda tadbirkorlar kengashlari tashkil etilib, ular mahalliy mehnat bozorining ehtiyojlarini inobatga olgan holda kasbiy o‘quv jarayonini yo‘naltiradi.
Shuningdek, Bandlik va qashshoqlikni qisqartirish vazirligi vaucher tizimiga kirmagan fuqarolarni kasb-hunarga o‘qitishni amalga oshiradi.
2027-yil 1-yanvardan boshlab esa iqtisodiyot tarmoqlarida ishga joylashish bosqichma-bosqich Milliy malaka doirasi talablariga bog‘lanadi. Bunda nomzodlar tegishli diplom yoki malaka sertifikatiga ega bo‘lishi lozim.
Bundan tashqari, kasb-hunar ta’limi muassasalariga o‘z xizmatlari uchun bozor narxlarini mustaqil belgilash va malakali mutaxassislarni shartnoma asosida bevosita jalb etish huquqi beriladi.
