Tashqi ishlar vazirligi Rossiyadagi o‘zbekistonliklarni ogohlantirdi
So‘nggi paytlarda “Telegram”dagi ayrim kanallarda hujjatlarni “tez va arzon” tayyorlab berishni va’da qilayotgan jinoiy guruhlar faoliyati kuchaygan.
O‘zbekiston Respublikasi Tashqi ishlar vazirligi Rossiya Federatsiyasida yashayotgan vatandoshlarni internetdagi soxta e’lonlar va qalbaki hujjatlar bilan bog‘liq firibgarliklardan ogohlantirdi.
Ma’lum qilinishicha, so‘nggi paytlarda ijtimoiy tarmoqlarda, xususan, “Telegram” ilovasidagi ayrim kanallarda “hujjatlarni tez va arzon rasmiylashtirish”ni taklif qiluvchi firibgar guruhlar faollashgan.
Vazirlikning xabar berishicha, Rossiyada joylashgan O‘zbekiston konsullik muassasalariga soxta hujjatlar taqdim etish bilan bog‘liq bir qator holatlar qayd etilgan. Jumladan, Qozon shahridagi Bosh konsullik tomonidan O‘zbekiston fuqarosi nomiga qalbaki “Vatanga qaytish guvohnomasi” olishga urinish va soxta nikoh guvohnomasi taqdim etilgan holatlar aniqlangan va Rossiya qonunchiligi bo‘yicha jinoyat ishi ochilgan. Shuningdek, boshqa bir fuqaro qalbaki nikoh hujjati asosida bola uchun tug‘ilganlik haqidagi guvohnoma olgani ma’lum bo‘lgan.
Vazirlik barcha O‘zbekiston fuqarolarini rasmiy hujjatlarni faqat vakolatli davlat organlari – elchixonalar, konsulliklar va FHDYo bo‘limlari orqali rasmiylashtirishga chaqirmoqda.
