Erdo‘g‘on: “Biz urushni tugatishga hissa qo‘shishga tayyormiz”

Turkiya Prezidenti Rajab Toyyib Erdo‘g‘on mamlakatining AQSh va Rossiya o‘rtasida o‘tkazilishi rejalashtirilayotgan sammitga mezbonlik qilishga tayyorligini bildirdi.

 

Bu haqda Turkiya ommaviy axborot vositalari xabar berdi. Davlat rahbarining ta’kidlashicha, Turkiya, xususan, Istanbul tinchlik muzokaralari uchun qulay maydon bo‘la oladi.

 

“Turkiya va Istanbulning Ukrainadagi mojaroga tinch yo‘l bilan yechim topishdagi roli yana bir bor o‘z isbotini topdi. Biz istalgan vaqtda Ukraina bo‘yicha muzokaralarni tashkil etishga tayyormiz. Vengriyada rejalashtirilgan uchrashuv amalga oshmagani achinarli, ammo har qanday muloqot urushni tugatishga xizmat qiladi”, — dedi Erdo‘g‘on Fors ko‘rfazi mamlakatlariga qilgan safaridan so‘ng.

 

Turkiya yetakchisi, shuningdek, Anqara ham AQSh, ham Rossiya bilan ishonchli va barqaror diplomatik munosabatlarga ega ekanini ta’kidladi. Unga ko‘ra, bu omil Turkiyani tinchlik muzokaralari uchun ishonchli platformaga aylantiradi.