Janubiy Koreyada noqonuniy muhojirlarga qarshi keng ko‘lamli reydlar boshlandi
Yil boshidan buyon 26 nafar o‘zbekistonlik E-9 vizasi shartlarini buzganlik uchun jazoga tortilgan.
Janubiy Koreya hukumati mamlakat hududida noqonuniy yashayotgan xorijiy fuqarolarni aniqlash va immigratsiya tartiblarini mustahkamlash maqsadida yirik ko‘lamli reydlarni boshladi.
Adliya vazirligi, milliy politsiya, dengiz politsiyasi hamda Mehnat va transport vazirliklari hamkorligida o‘tkazilayotgan tekshiruvlar 12-dekabrgacha davom etadi. Tadbirlar noqonuniy mehnat faoliyati bilan shug‘ullanayotgan chet elliklar, vositachilar hamda mamlakatda ruxsatsiz istiqomat qilayotgan shaxslarni aniqlashga qaratilgan.
Ayniqsa, 2025-yilda bo‘lib o‘tadigan APEC Koreya sammiti arafasida xavfsizlik choralarining kuchaytirilishi munosabati bilan Kyonju shahri va unga tutash hududlarda nazorat kuchaytirildi.
Janubiy Koreya qonunchiligiga ko‘ra, immigratsiya qoidalarini buzgan shaxslarga nisbatan jarima, deportatsiya va mamlakatga kirishni cheklash chorasi qo‘llanadi. Shu bilan birga, Adliya vazirligi reydlar jarayonida xorijliklarning inson huquqlari to‘liq ta’minlanishiga alohida e’tibor qaratilishini ma’lum qildi.
Shuningdek, muhojirlarga o‘z ixtiyori bilan mamlakatni tark etish yoki huquqiy maqomini qonuniylashtirish tavsiya etildi. Rasmiylar bu usul kelgusida og‘irroq huquqiy oqibatlarning oldini olishga xizmat qilishini ta’kidlamoqda.
O‘zbekiston Tashqi mehnat migratsiyasi agentligi ma’lumotlariga ko‘ra, yil boshidan buyon 26 nafar o‘zbekistonlik fuqaroga E-9 vizasi shartlarini buzganlik uchun jarima qo‘llanilgan. Uch tomonlama kelishuvga muvofiq, har bir noqonuniy o‘tgan oy uchun 2000 AQSh dollari miqdorida jarima belgilangan.
