“A1” guvohnomasini olish uchun imtihonda 16 ta to‘g‘ri javob topish kifoya
“A” va “B” toifalarida nazariy mashg‘ulotlar majburiyati bekor qilinadi.
Moped va skuter egalari uchun haydovchilik guvohnomasini olish jarayoni sezilarli darajada soddalashtirildi. Vaqt va moliyaviy yukni kamaytirish maqsadida Vazirlar Mahkamasi tomonidan yangi qaror qabul qilindi, deb xabar beradi Yo‘l harakati xavfsizligi xizmati.
2026-yil 1-yanvardan “A1” kichik toifali guvohnoma joriy etiladi. Endilikda nazariy va amaliy kurslarda qatnashmasdan, mustaqil tayyorgarlik ko‘rib, 20 savoldan 16 tasiga to‘g‘ri javob berganlar guvohnomaga ega bo‘lishadi. Shuningdek, “A”, “B”, “C” va “D” toifali haydovchilar “A1” toifadagi transport vositalarini alohida guvohnomasiz boshqarishi mumkin.
2026-yil 1-fevraldan “A” va “B” toifalarida nazariy mashg‘ulotlar majburiyati bekor qilinadi. Talabgorlar uydan onlayn yoki o‘quv markazlarida oflayn tarzda tayyorlanib, guruh to‘lishini kutmasdan amaliy mashg‘ulotlarni boshlashi mumkin.
2026-yil 1-apreldan jarima ballari tizimi ham yangilanadi. Endilikda yo‘l harakati qoidabuzarliklari uchun ballar ruldagi haydovchiga yoziladi, avtomobil egasiga emas. Shuningdek, ijaraga berilgan avtomobillar bo‘yicha jarima balini real haydovchiga taqsimlash imkoniyati yaratiladi.
Yangi tartib moped va skuter haydovchilari uchun qulaylik yaratib, avtomaktablardagi byurokratik to‘siqlarni bartaraf etadi va barcha haydovchilarni mas’uliyatli bo‘lishga chorlaydi.
