Hokimlik: Bobur ko‘chasida daraxtlar “qurib borayotgan edi”
Toshkentda 144 tup daraxtning noqonuniy kesilishi bilan bog‘liq holat bo‘yicha rasmiy izoh berildi.
Toshkent shahar hokimligi Bobur ko‘chasida olib borilayotgan obodonlashtirish va ko‘kalamzorlashtirish ishlari jarayonida ayrim e’tiborsizlik holatlari kuzatilganini ma’lum qildi.
Xususan, 83 tup piramidasimon gujum (eliks) va 62 mingdan ortiq manzarali buta ko‘chatlarini ekish ishlari doirasida avval o‘sib turgan o‘simliklar bilan bog‘liq faoliyatda belgilangan talablar to‘liq bajarilmagani aniqlangan.
Ma’lumotlarga ko‘ra, mazkur hududda ilgari 145 tup archa mavjud bo‘lgan. Mutaxassislar xulosasiga ko‘ra, ularning aksariyati kasallikka chalinib, qurish bosqichida bo‘lgan. Dastlab daraxtlarni ehtiyotkorlik bilan ko‘chirib o‘tkazish rejalashtirilgan bo‘lsa-da, ayrim mas’ullar bu jarayonda talablarni buzgan.
Hozirda holat yuzasidan xizmat tekshiruvi o‘tkazilmoqda. Natijalarga ko‘ra, qonuniy choralar ko‘rilishi bildirilgan.
Toshkent shahar hokimligi barcha obodonlashtirish ishlari qulay, xavfsiz va ekologik barqaror muhitni shakllantirishga qaratilganini ta’kidlab, shahar aholisi tomonidan tabiatni asrash masalasiga e’tibor bilan qaralayotganini yuqori baholadi va minnatdorchilik bildirdi.
Avvalroq, Ekologiya vazirligi maslahatchisi Rasul Kusherbayev ma’lum qilishicha, 25-oktabr kuni ertalab ijtimoiy tarmoqlarda Bobur ko‘chasidagi daraxtlarning noqonuniy kesilgani haqidagi videolavha tarqalgan edi.
Guvohlarning so‘zlariga ko‘ra, daraxtlar Yakassaray tumani hokimining o‘rinbosari topshirig‘i bilan Obodonlashtirish boshqarmasi tomonidan tungi vaqtda kesilgan. Ushbu harakat 2019-yilda Prezident farmoni bilan joriy etilgan daraxtlarni kesish bo‘yicha moratoriy talablariga zid hisoblanadi.
