Kamerunda 92 yoshli prezident 8-marta lavozimiga qayta saylandi
U 1982 yildan beri hokimiyat tepasida turibdi va bu uning navbatdagi muddati bo‘ladi.
Kamerunning Konstitutsiyaviy Kengashi 92 yoshli amaldagӣ prezident Pol Biyya mamlakat rahbari etib qayta saylanganini rasman eʼlon qildi. Rasmiy maʼlumotlarga ko‘ra, Biyya 53,66 foiz ovoz bilan g‘alaba qozongan. U 1982 yildan beri hokimiyat tepasida turibdi va bu uning navbatdagi muddati bo‘ladi.
Saylov natijalarini asosiy muxolif nomzod Issa Chiroma Bakaiyri tan olmadi. U o‘z hisob-kitoblariga ko‘ra g‘olib ekanini bildirdi va hukumatni ovozlarni soxtalashtirishda aybladi. Natijalar eʼlon qilingach, poytaxt Yaunde va boshqa shaharlarda norozilik namoyishlari boshlandi. Mahalliy OAV maʼlumotlariga ko‘ra, ayrim to‘qnashuvlarda bir nechta odam halok bo‘lgan, yuzlab fuqarolar esa qo‘lga olingan.
Xalqaro kuzatuvchilar saylov jarayonida ayrim kamchiliklar bo‘lganini qayd etgan. Ayrim hisobotlarda byulletenlarni sanash jarayonida shaffoflik yetishmagani va davlat resurslaridan prezident foydasiga ishlatilgani aytilgan.
Maʼlumot uchun, Pol Biyya dunyodagi eng uzoq vaqt hokimiyatda qolgan yetakchilardan biri hisoblanadi. 43 yildan ortiq boshqaruv davomida u mamlakatda nisbatan siyosiy barqarorlikni saqlab kelayotgan bo‘lsa-da, yosh avlod islohotlar va siyosiy yangilanishni talab qilmoqda.
