Pokiston–Afg‘oniston chegarasida qurolli to‘qnashuv: 30 dan ortiq kishi halok bo‘ldi
Islomobod “Tolibon”ni jangarilarga qarshi chora ko‘rmayotganlikda aybladi.
Pokiston armiyasi ma’lum qilishicha, 24–25 oktabr kunlari Afg‘oniston bilan chegaradosh Kurram va Shimoliy Vaziriston hududlarida yuz bergan qurolli to‘qnashuvlar oqibatida besh nafar pokistonlik harbiy va 25 nafar jangari halok bo‘lgan. Bu haqda “Al Jazeera” nashri Pokiston Qurolli kuchlari matbuot xizmatiga tayanib xabar berdi.
Rasmiy ma’lumotlarga ko‘ra, jangarilar Afg‘oniston hududidan Pokiston tomon o‘tishga uringan. Islomobod “Tolibon” hukumatini o‘z hududida faoliyat yuritayotgan qurolli guruhlar faoliyatiga qarshi yetarli chora ko‘rmayotganlikda aybladi.
Kobul esa bunday da’volarni qat’iyan rad etib, Pokiston tomonidan amalga oshirilayotgan harbiy amaliyotlar Afg‘oniston suverenitetini buzayotganini bildirdi.
Joriy oyning boshida Istanbulda ikki tomon vakillari o‘rtasida muzokaralar o‘tkazilib, chegara hududida takroriy to‘qnashuvlarning oldini olish masalasi muhokama qilingan edi. Biroq so‘nggi hodisa 2021-yilda “Tolibon” hokimiyat tepasiga kelganidan buyon eng keskin harbiy to‘qnashuvlardan biri sifatida baholanmoqda.
Pokiston mudofaa vaziri Xavaja Muhammad Asifning ta’kidlashicha, agar diplomatik muloqot natija bermasa, mamlakat ochiq harbiy javob choralari ko‘rishga tayyor.
Pokiston harbiylari so‘nggi to‘qnashuvlarda ishtirok etganlarni “Fitna al-Xavorij” deb atadi — bu atama xorijiy g‘oyalar ta’siridagi qurolli guruhlarga nisbatan ishlatiladi.
