Rossiyada migrantlarning 35 foizi rus tili imtihonidan o‘ta olmadi
Imtihonlar mamlakatning 203 ta punktida, shuningdek, O‘zbekiston va Tojikistonda ham o‘tkazilmoqda.
Rossiya Federatsiyasi Ta’lim va fan vazirligi ma’lumotlariga ko‘ra, xorijlik mehnat migrantlarining uchdan bir qismi rus tili imtihonidan o‘ta olmadi. Bu haqda “RIA Novosti” agentligi xabar berdi.
2025-yil iyul–sentyabr oylarida o‘tkazilgan test sinovlarida ishtirok etgan 275,6 ming nafar chet ellik fuqarolarning qariyb 35 foizi birinchi urinishda imtihonni topshira olmadi. Shu bilan birga, rus tilidan imtihonni muvaffaqiyatli topshirganlar ulushi 87 foizni tashkil etdi.
Rossiyada mehnat faoliyatini amalga oshirish uchun birinchi darajali attestatsiya talab etiladi — bu darajada faqat til bo‘yicha imtihon o‘tkaziladi. Ikkinchi bosqich vaqtinchalik yashash ruxsatnomasini (RVP) olish uchun, uchinchi bosqich esa doimiy yashash guvohnomasini (VNJ) olish uchun zarur bo‘lib, ularga Rossiya tarixi va qonunchiligi asoslari bo‘yicha testlar ham kiradi.
Vazirlik ma’lumotiga ko‘ra, imtihon topshirish uchun mamlakat bo‘ylab 203 ta maxsus punkt tashkil etilgan. Shuningdek, test markazlari Rossiya tashqarisida ham, xususan, Tojikiston va O‘zbekiston hududlarida ham faoliyat yuritadi.
Avvalroq ayrim toifalardagi migrantlar uchun rus tili imtihoni talablari soddalashtirilgani ma’lum qilingan edi. Bunga vatandoshlarni ko‘ngilli ravishda qaytarish dasturi ishtirokchilari hamda Rossiyaga ko‘chib o‘tishni rejalashtirgan va mamlakatning an’anaviy ma’naviy-axloqiy qadriyatlariga hurmat bilan qaraydigan shaxslar kiradi.
