Samarqandda bankdan qarzdor fuqaroning mashinasi xatlandi
Fuqaro qidiruvdagi mashinasini kechki vaqtlarda boshqarib yurgan.
Fuqarolik ishlari bo‘yicha Samarqand shahar sudining ijro varaqasiga asosan, Majburiy ijro byurosining Ishtixon tumani bo‘limi ish yurituvida javobgar fuqaro F.E.ga nisbatan ijro hujjati kelib tushgan.
Ushbu hujjatga ko‘ra, javobgar F.E.dan daʼvogar “Kapitalbank” AJ foydasiga 297 million so‘m miqdoridagi qarz undirilishi lozim.
Qarzdor tomonidan belgilangan ixtiyoriy muddat ichida ijro hujjati talablari bajarilmagani sababli, amaldagi qonunchilikka muvofiq, unga tegishli “Malibu 2” rusumli avtotransport vositasiga qidiruv eʼlon qilindi.
Keyinchalik davlat ijrochisi tomonidan amalga oshirilgan tezkor chora-tadbirlar natijasida qarzdorga tegishli “Malibu 2” avtomashinasi faqat kechki vaqtlarda harakatlanayotgani aniqlandi.
Hozirda mazkur avtomashina belgilangan tartibda vaqtincha saqlash uchun jarima maydonchasiga joylashtirilgan bo‘lib, ijro hujjatining to‘liq ijrosini taʼminlash maqsadida tegishli chora-tadbirlar davom ettirilmoqda.
