Toshkentda salkam 200 tup daraxt noqonuniy kesilgani aniqlandi
Buning oqibatida tabiatga 1.46 mlrd so'mlik zarar yetkazilgan.
Ijtimoiy tarmoqlarda 25-oktabr kuni tunda “daraxtlarning kesilganlik holati” aks etgan videolavha tarqaldi. Mazkur holat yuzasidan Ekologiya vazirligi huzuridagi Davlat ekologik nazorat inspeksiyasi tomonidan o‘rganish o‘tkazildi.
Tekshiruv natijalariga ko‘ra, Toshkent shahri Yakkasaroy tumani Nukus va Bobur ko‘chalari kesishmasidan boshlab avtomobil yo‘li yoqasida jami 174 tup daraxt va buta kesilgani aniqlandi. Ekologiya inspektori tomonidan tegishli bayonnomalar rasmiylashtirilib, atrof-muhitga yetkazilgan zarar miqdori 1 milliard 460 million 952 ming so‘m etib belgilandi.
Holat yuzasidan to‘plangan hujjatlar qonunchilikda belgilangan tartibda chora ko‘rilishini ta’minlash uchun prokuratura organlariga yuborildi.
Toshkent shahar hokimligi rahbariyati vaziyatni o‘z nazoratiga olib, atrof-muhitga zarar yetkazgan mas’ullarga nisbatan qonuniy chora ko‘rilishini ma’lum qildi. Shu bilan birga, bunday holatlarning kelgusida takrorlanmasligi uchun Ekologiya vazirligi bilan hamkorlikda tizimli ishlar olib borilishi ta’kidlandi.
Bundan tashqari, hokimlik tomonidan kesilgan daraxtlarning o‘rnini to‘ldirish maqsadida 62,1 ming dona buta va manzarali daraxt ko‘chatlarini ekish rejalashtirilgani bildirildi.
