Yana 2,5 yil sabr qilsak, elektr tanqisligi tugaydi — Japarov
Qirg‘izistonda 40 dan ortiq yangi GES va issiqlik stansiyalari qurilmoqda.
Qirg‘iziston Prezidenti Sadir Japarov 27-oktabr kuni Jalolobod viloyatiga tashrifi chog‘ida Qorako‘l gidroelektr stansiyasining ochilish marosimida so‘zga chiqdi. Davlat rahbari marosimda mamlakat energetika tizimidagi islohotlar va kelgusi rejalar haqida ma’lumot berdi.
Prezidentning ta’kidlashicha, Qorako‘l GESning ishga tushirilishi Qirg‘izistonning energetik xavfsizligini mustahkamlash va milliy iqtisodiyot barqarorligini oshirishda muhim qadam hisoblanadi.
“Qish mavsumida elektr ta’minotida qisqa muddatli uzilishlar bo‘lishi mumkin. 30 yil chidadik, yana ikki yarim yil sabr qilamiz. Bu davr yakunlangach, mamlakatimiz elektr energiyasini import qilishdan voz kechadi”, — dedi Japarov.
Uning so‘zlariga ko‘ra, loyiha belgilangan muddatdan besh oy oldin yakunlanib, mahalliy “Jagalmay” kompaniyasi tomonidan milliy resurslardan foydalangan holda amalga oshirilgan.
Shuningdek, hozirda mamlakat bo‘ylab 40 ga yaqin kichik va o‘rta GESlar, hamda Qora-Keche issiqlik elektr stansiyasi qurilayotgani bildirildi. Ushbu inshootlar to‘liq ishga tushgach, Qirg‘iziston nafaqat elektr importini to‘xtatadi, balki energiya eksport qiluvchi davlatga aylanishi rejalashtirilmoqda.
“Tabiiy resurslarimizdan oqilona foydalanish boshlanganini bugun yaqqol ko‘rmoqdamiz. Qorako‘l GES – mamlakatimiz energetik mustaqilligi yo‘lidagi muhim bosqich”, — dedi Prezident Japarov.
Ma’lumot uchun, Qorako‘l gidroelektr stansiyasi Qorasuv daryosida barpo etilgan bo‘lib, zamonaviy texnologiyalar bilan jihozlangan. Loyihaga ko‘ra, GES 15 yil faoliyat yuritganidan so‘ng davlat balansiga o‘tkaziladi.
