Janubiy Koreyada terrorchilik faoliyatini moliyalashtirgan O‘zbekiston fuqarosi qo‘lga olindi
29 yoshli fuqaro xayriya loyihasi niqobi ostida ekstremistik guruhlarga 665 ming dollar o‘tkazgan.
Janubiy Koreya huquqni muhofaza qilish organlari tomonidan 29 yoshli O‘zbekiston fuqarosi terrorchilik faoliyatini moliyalashtirishda ayblanib hibsga olindi. U xayriya tashkiloti niqobi ostida ekstremistik guruhlarga mablag‘ yo‘naltirganlikda gumon qilinmoqda.
Tergov materiallariga ko‘ra, gumonlanuvchi African Well nomli soxta xayriya loyihasi orqali kriptovalyuta (Tether – USDT) ko‘rinishida mablag‘ yig‘ib, ularni “Katiba Tavhid val Jihod” va “Hamas” terrorchilik tashkilotlariga o‘tkazgan. Yig‘ilgan mablag‘ miqdori 952 million vonni (taxminan 665 ming AQSh dollari) tashkil etgan — bu mamlakatda shu turdagi eng katta holat sifatida qayd etilgan.
O‘zbekistonlik shaxs ilgari ham terrorizmni moliyalashtirishda gumon qilingan va O‘zbekiston huquqni muhofaza qilish idoralari tomonidan qidiruvga berilgan edi. Elchixona uning pasportini bekor qilganidan so‘ng, Janubiy Koreya politsiyasi maxsus operatsiya davomida gumonlanuvchini qo‘lga olgan.
Tekshiruv natijasida gumonlanuvchining sakkizta telefon va bir nechta elektron qurilmalari musodara qilindi. Shuningdek, u bir necha ijtimoiy tarmoqlarda ekstremistik g‘oyalarni targ‘ib qilgan, diniy niqob ostida terrorchilikka da’vat etuvchi xabarlarni tarqatgani aniqlangan.
Hozirda tergov organlari gumonlanuvchining Janubiy Koreyadagi ehtimoliy sheriklarini aniqlash va mablag‘larning yakuniy manzillarini aniqlash ustida ish olib bormoqda.
