194 ta mamlakatdan tashrif, 150 dan ortiq tadbir: Samarqandda tarixiy anjuman boshlanmoqda
YUNESKO Bosh konferensiyasi sessiyasi ilk bor Parijdan tashqarida — Samarqandda o‘tkazilmoqda. 15 kun davom etadigan ushbu xalqaro tadbir dasturi nimalardan iborat?
Ertaga, 30-oktyabr kuni Samarqandda YUNESKO Bosh konferensiyasining 43-sessiyasi yig'ilishlari boshlanadi. Ayni paytda Samarqand ushbu nufuzli xalqaro tadbirga deyarli tayyor. Konferensiyani yuqori darajada tashkil etish, xavfsizlikni ta'minlash maqsadida hatto xorijdan ham xodimlari ham jalb etilgan.
Shuni alohida ta'kidlash kerak, YUNESKO Bosh konferensiyasining 43-sessiyasi so‘nggi qirq yil ichida ilk bor Parijdan tashqarida boshqa shaharda, 30 oktyabr - 13 noyabr kunlari Samarqandda bo‘lib o‘tadi.
Yirik tadbirda dunyoning 194 ta mamlakatidan prezidentlar, hukumat rahbarlari, ilm-fan, taʼlim va madaniyat sohalari ekspertlari ishtirok etishi kutilmoqda. Shu bilan birga, anjumanda 20 dan ortiq xalqaro tashkilotlar vakillari jam bo‘ladi.
Bugun ertalab tadbirda ishtirok etish uchun tashkilot Bosh direktori Odri Azule xonim va konferensiya ishtirokchilari “Parij - Samarqand” charter reysi bilan bugun tongda Samarqand shahriga keldi.
2017 yildan buyon tashkilotga rahbarlik qilgan Odri Azule uchun mazkur sessiya uning YUNESKO Bosh direktori sifatida qatnashgan so‘nggi sessiyasi bo‘ladi. Samarqandda YUNESKOning yangi bosh direktori rasman ishga kirishadi. Bu vazifaga yaqinda tashkilot Ijroiya qo‘mitasining 222-sessiyasida o‘tkazilgan saylovda g‘olib chiqqan misrlik 54 yoshli Xolid Al-Ananiy tasdiqlanadi.
Konferensiya dasturi doirasida 150 dan ortiq tadbir o‘tkazilishi rejalashtirilgan. Xususan, Registon majmuasida katta konsert tashkil etiladi.
O‘z navbatida madaniy meros yo‘nalishida xalqaro muzey konferensiyasi, yoshlar forumi, Mirzo Ulug‘bek va amaliy sanʼatga bag‘ishlangan ko‘rgazmalar tayyorlanmoqda.
Konferensiya yakunida “Samarqand deklaratsiyasi” qabul qilinishi, unda inson kapitaliga sarmoya kiritish, madaniy xilma-xillikni asrash, barqaror rivojlanish maqsadlariga hissa qo‘shish va ilm-fan orqali tinchlikni mustahkamlash kabi g‘oyalar o‘z ifodasini topishi kutilmoqda.
Umuman olganda, Samarqand sessiyasi YUNESKO va O‘zbekiston o‘rtasidagi strategik hamkorlikni yangi bosqichga olib chiqadi va mamlakatning global miqyosdagi nufuzini oshiradi. Jarayonlarni Zamon.uz'da kuzatib boring.
