Pokiston-Afg‘oniston tinchlik muzokaralarida kelishuvga erishilmadi
Pokiston Tolibondan "Tahrik-i-Tolibon Pokiston"ni terrorchi deb e’lon qilishni talab qilmoqda.
Pokiston hukumatining Afg‘onistondagi Tolibon hukumati oldiga qo‘ygan talablari Istanbul shahrida bo‘lib o‘tayotgan muzokaralarda muhokama qilinmoqda. Pokiston delegatsiyasi "Tahrik-i-Tolibon Pokiston" (TTP) guruhini rasman terrorchi tashkilot deb e’lon qilish va uning faoliyatiga qarshi kurashishni talab qilmoqda.
Muzokaralar jarayonida Pokiston vakillari TTP tomonidan amalga oshirilgan har qanday terrorchilik harakatlari uchun javobgarlik Afg‘oniston hukumati zimmasiga yuklanishini ta’kidlab, agar TTP hujumlari davom etsa, Afg‘oniston hududiga havo zarbalari berish imkoniyati haqida ogohlantirgan.
Tolibon vakillari esa bu masalada qat'iy pozitsiyani saqlab, TTPni mas'ul guruh sifatida tan olishdan bosh tortganliklarini va bu muammoni Pokistonning ichki ishi deb hisoblashlarini bildirgan.
Qatar va Turkiya vositachiligidagi muzokaralarda Pokistonning yetti nafar diplomati va razvedka xodimi, shuningdek olti nafar Afg‘oniston vakili ishtirok etdi. To‘rt kundan beri davom etayotgan muzokaralarda aniq kelishuvga erishilmadi.
