Yangi Toshkent aeroporti qurilishi uchun uylar buziladi
Aeroport qurilishi uchun ayrim mahallalardan yer ajratilgan.
Avvalroq O‘rta Chirchiq va Quyi Chirchiq tumanlarining tutash hududida Yangi Toshkent aeroporti qurilishi xabar qilingandi. Joriy yilning 20-oktyabr kuni Prezident boshchiligida mazkur loyihaga start berilgan.
Aeroport qurilishi uchun O‘rta Chirchiq tumanining Xalqobod va Yangiyo‘l mahallalarida ayrim aholi xonadonlari va bino-inshootlar buzilishi rejalashtirilgan.
Tuman hokimligi matbuot xizmatiga ko‘ra, bugun aeroport qurilishi bilan bog‘liq tashkiliy yumushlar doirasida tumani hokimi Xalqobod mahallasi aholisi hamda hududdagi fermer xo‘jaliklari rahbarlari bilan muloqot o‘tkazgan.
Unda aholi xonadonlariga va fermer xo‘jaliklari hududidagi mavjud bino-inshootlariga kompensatsiya to‘lab berilishi, uning tartiblari haqida atroflicha tushuntirish hamda aholi va fermerlar tomonidan berilgan savollarga javob berilgan.
