YUNESKOning Milliy komissiyalar yig‘ilishida qaysi masalalar ko‘tarildi?

Avvalroq Samarqandda YUNESKO ishlari bo‘yicha milliy komissiyalarning XII mintaqalararo uchrashuvi o‘z ishini boshlagani haqida xabar berilgan edi. Madaniyat va sanʼatni rivojlantirish jamg‘armasi unda qanday masalalar muhokama qilingani haqida maʼlumot berdi.

 

Qayd etilishicha, tadbirda YUNESKO Bosh direktori o‘rinbosari Sin Syuy (Xing Qu) va YUNESKO ishlari bo‘yicha O‘zbekiston Milliy komissiyasi raisi, O‘zbekiston Madaniyat va sanʼatni rivojlantirish jamg‘armasi raisi, Prezident Administratsiyasi Kreativ iqtisodiyot va turizm bo‘yicha departamentining rahbari Gayane Umerova tabrik so‘zlarini yo‘llagan. Uchrashuvga raislik qilish uchun saylangan Gayane Umerova o‘z nutqida Samarqandning tamaddunlar chorrahasi sifatidagi ramziyligini taʼkidlab, YUNESKO tomonidan belgilab berilgan sheriklik va birdamlik ruhini yangilash muhimligini taʼkidlagan.

 

Ertalabki dastur mavzuga oid ikki sessiyadan iborat bo‘lgan. Birinchisi yoshlarning huquq va imkoniyatlarini kengaytirish hamda barqaror rivojlanish uchun ularning tinchlik, inson huquqlari, ijtimoiy inklyuziya va taʼlimni ilgari surishdagi roliga bag‘ishlangan. Muhokamada YUNESKO, shuningdek, Germaniya, Kanada va Keniya milliy komissiyalari vakillari ishtirok etgan.

 

Ikkinchi muhokama sho‘basi raqamli davrda madaniyatlar va jamoalarning o‘zaro muloqotiga bag‘ishlanib, unda madaniy meros, barqaror turizm va Ipak yo‘li yo‘nalishlariga eʼtibor qaratilgan. So‘zga chiqqanlar orasida YUNESKO hamda Fransiya, Kyurasao va O‘zbekiston milliy komissiyalari vakillari bo‘lgan.