“43-sessiya mintaqa tarixidagi eng yirik xalqaro forumlardan biri bo‘ladi”
O‘zbekiston Prezidenti matbuot kotibi Sherzod Asadov YUNESKO Bosh konferensiyasi 43-sessiyasi arafasida ommaviy axborot vositalari vakillari uchun brifing o‘tkazdi.
Bugun Samarqand shahrida YUNESKO Bosh konferensiyasining 43-sessiyasi o'z ishini boshlaydi. Tarixiy ahamiyatga ega bo'lgan bu forum so'nggi 40 yil ichida ilk bor YUNESKOning Parijdagi bosh qarorgohidan tashqarida va birinchi marta Markaziy Osiyoda o'tkazilmoqda. Forum YUNESKO tashkil etilganining 80 yilligi bilan ham mos kelmoqda.
43-sessiya mintaqa tarixidagi eng yirik xalqaro forumlardan biriga aylanishi kutilmoqda. Unda 190 ta a'zo davlat va xalqaro tashkilotlardan 2 ming 800 dan ortiq vakil, shu jumladan 70 ga yaqin yuqori darajali shaxslar ishtirok etadi. Tantanali ochilish marosimida faxriy mehmonlar sifatida hozir mamlakatimizda bo'lib turgan Serbiya Respublikasi Prezidenti Aleksandr Vuchich va Slovakiya Respublikasi Prezidenti Peter Pellegrini ham qatnashadi.
Samarqand sessiyasi doirasida 150 dan ortiq turli tadbirlar o'tkaziladi, shu jumladan O'zbekiston tashabbusi bilan 20 dan ziyod qo'shimcha tadbirlar tashkil etilgan. Tantanali ochilish marosimida Prezidentimiz Shavkat Mirziyoyev ishtirok etib, nutq so'zlaydi. Davlatimiz rahbarining nutqida bir qator muhim tashabbuslar ilgari surilishi kutilmoqda.
Tadbir doirasida Prezidentimiz Slovakiya Prezidenti Peter Pellegrini va YUNESKO Bosh direktori Odri Azule bilan ikki tomonlama uchrashuvlar o'tkazadi. YUNESKO Bosh konferensiyasining 43-sessiyasi dunyo va mamlakatimizning yetakchi ommaviy axborot vositalari, jami 500 dan ziyod jurnalist tomonidan yoritiladi. Samarqandda ularning samarali faoliyati uchun barcha sharoitlar yaratilgan.
