O‘zbekiston va Serbiya birinchi xonimlari “Imkon” markaziga tashrif buyurdi
“Imkon” markazi bolalar bog‘chasi, logopedik va psixologik yordam, shuningdek, tibbiy va ijtimoiy reabilitatsiya xizmatlarini o‘zida mujassam etgan.
Toshkent viloyati, Qibray tumanida joylashgan “Imkon” ko‘p tarmoqli ixtisoslashtirilgan maktabgacha ta’lim muassasasiga O‘zbekiston birinchi xonimi Ziroat Mirziyoyeva va Serbiya birinchi xonimi Tamara Vuchichning birgalikdagi tashrifi bo‘lib o‘tdi.
Muassasa rahbariyati mehmonlarga markazning alohida parvarishga muhtoj bolalar uchun yaratilgan zamonaviy sharoitlari va kompleks xizmatlari haqida batafsil ma’lumot berdi. “Imkon” markazi bolalar bog‘chasi, logopedik va psixologik yordam, shuningdek, tibbiy va ijtimoiy reabilitatsiya xizmatlarini o‘zida mujassam etgan.
Tashrif davomida Birinchi xonimlar markazning bolalari, tarbiyachilari va ota-onalari bilan samimiy suhbatlashib, ularning tajriba va mulohazalarini eshitishdi. Ziroat Mirziyoyeva O‘zbekistonda inklyuziv ta’lim tizimini rivojlantirish va bolalar huquqlarini himoya qilish borasidagi izchil siyosatni ta’kidladi.
Tamara Vuchich o‘z navbatida, O‘zbekistonda alohida e’tibor va g‘amxo‘rlik talab qiluvchi bolalar uchun yaratilgan sharoitlar va ko‘rsatilayotgan yordamdan chuqur taassurot qolganini bildirdi. U “Imkon” markazining faoliyati va ushbu sohadagi yutuqlarni yuqori baholadi.
Tadbir ikki davlat o‘rtasida gumanitar va ijtimoiy sohalardagi hamkorlikni yanada rivojlantirish istagini aks ettirdi.
