Toshkentdagi maktablarda yana niqob taqish joriy qilinmoqdami?
Tarqalayotgan xabarlarga oydinlik kiritildi.
Ijtimoiy tarmoqlarda 30-oktabrdan boshlab Toshkent shahridagi maktablarda tibbiy niqob taqish tartibi joriy etilishi bilan bog‘liq xabarlar tarqalmogda.
Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Atabekov bu masalaga oydinlik kiritdi.
— Ijtimoiy tarmoqlarda ushbu masala noto‘g‘ri talqin qilinmoqda. Avvalo, ularda O‘zbekiston Respublikasi Bosh davlat sanitariya vrachining shu yil 26 sentyabrdagi qarori asos qilib ko‘rsatilayapti. Hujjat sanasiga e‘tibor bering: u sentyabr oyida imzolangan. Asilda, har yili mavsumiy o‘tkir respirator kasalliklar va gripp avj olishidan oldin bu kabi qarorlar qabul qilinib, joylardagi muassasalarga tegishli tavsiyalar berib kelinadi, dedi Atabekov.
Ma’lum qilinishicha, qarorda epidemiq vaziyat murakkablashganda tibbiy niqob taqish belgilangan. Hozir epidemiq vaziyat barqaror, shunday ekan, maktablarda yoppasiga niqob taqish zarurati yo‘q. Agar guruhda kasallangan bolalar bo‘lsa, o‘sha bemor bilan muloqotga kirishish ehtimoli bor joylardagina niqob taqish tavsiya etiladi.
Havo-tomchi yo‘li bilan yuqadigan kasalliklarda imkon qadar ijtimoiy masofa saqlash va muloqot davrida niqobda bo‘lish maqsadga muvofiq.
Hujjatda aytib o‘tilgan tibbiy niqob taqish tartibi joylarda vaziyatga qarab hal qilinadi. Buni zinhor yoppasiga shunday tartib joriy qilinayapti, deb talqin qilmaslik kerak.
Shu ma’noda, mazkur qarorga joylardagi epidemiq vaziyat qay darajada murakkab yoki murakkab emasligidan kelib chiqib, tegishli chora qabul qilish uchun mo‘ljallangan odatiy hujjat sifatida qaralishi zarur, deyiladi SSV matbuot xizmati e’lon qilgan rasmiy munosabatda.
Avvalroq Urgutda mast erkak o‘qituvchini kaltaklagani haqida xabar berilgan edi.
