Namanganda noqonuniy dori ishlab chiqarish sexi fosh qilindi
Qo‘lboda usulda tayyorlangan dorilar Farg‘ona vodiysi va Toshkent va boshqa viloyatlarga yetkazib berilgan.
Namangan shahrida Davlat xavfsizlik xizmati, Iqtisodiy jinoyatlarga qarshi kurash departamenti va Bojxona qo‘mitasi hamkorligida noqonuniy dorivor moddalar aylanmasiga qarshi tezkor tadbir o‘tkazildi. Tadbir davomida biologik faol qo‘shimchalar ishlab chiqaruvchi MChJ tomonidan qonuniy talablarga zid ravishda tashkil etilgan dori ishlab chiqarish sexi fosh qilindi.
Tekshiruvlar davomida quyidagi moddiy boyliklar ashyoviy dalil sifatida rasmiylashtirildi:
- 138 031 quti (9 turdagi) dori va biologik faol qo‘shimchalar (1,2 mlrd so‘mdan ortiq)
- 1,8 mlrd so‘mlik prekursorlar
- 3,4 mlrd so‘mlik flakon, qopqoq, quti va etiketkalar
- 18 mlrd so‘mlik ishlab chiqarish uskunalari (14 nomda)
- 5,6 mlrd so‘mlik maxsus idishlar (23 dona)
Jami 30 mlrd so‘m qiymatdagi moddiy boyliklar musodara qilindi.
MChJ faqatgina biologik faol qo‘shimchalarni ishlab chiqarish uchun sertifikat olgan bo‘lsa-da, sanitariya talablariga javob bermaydigan joyda 9 turdagi kontrafakt dori vositalarini tayyorlagan. "Pikovit" dorisi "Pivovit", "Kanefron" - "Kanaseron", "Espumizan" - "Espumetik", "Nistatin" - "Nestitam" ko‘rinishida ishlab chiqarilgan.
Qo‘lboda usulda tayyorlangan dori vositalari Farg‘ona vodiysi, Toshkent shahri va boshqa viloyatlarga yetkazib berilgan. Hozirda qalbaki dori vositalari bo‘yicha ekspertiza tayinlanib, surishtiruv ishlari olib borilmoqda.
