Andijonda fuqaro ijtimoiy xodimni choynak bilan urib jarohatladi
Hozirda holat yuzasidan sud-tibbiyot ekspertizasi tayinlangan.
Andijon shahridagi mahalla fuqarolar yig‘ini maʼmuriy binosida ijtimoiy xodimga nisbatan jismoniy zo‘ravonlik sodir etildi. Bu haqida Ijtimoiy himoya milliy agentligi xabar bermoqda.
Qayd etilishicha, hodisa bugun, 1-noyabr kuni yuz bergan. Unda 1988 yilda tug‘ilgan, oliy maʼlumotli, 4 nafar farzand onasi, 2024-yil iyundan buyon “Inson” markazida kompleks ijtimoiy xizmatlar ko‘rsatuvchi ijtimoiy xodim sifatida faoliyat yuritayotgan M.D. jabrlangan.
Mojaro sodir bo‘lishiga mahalla fuqarolari — 1985 yilda tug‘ilgan Y.G. hamda 1991 yilda tug‘ilgan Y.D. ning elektr energiya uchun beriladigan bir martalik 1 mln so‘mlik kompensatsiya puli bank tomonidan qarz evaziga ushlab qolingani sabab bo‘lgan.
Janjal vaqtda ushbu fuqarolardan biri qo‘ldagi sopol choynak bilan ijtimoiy xodimga zarba berib, yuzi va qo‘liga tan jarohati yetkazgan.
Ijtimoiy xodim D.M. tomonidan 102 raqamiga murojaat qilingan va hozirda holat bo‘yicha tergovga qadar tekshiruv ishlari olib borilmoqda. Sud-tibbiyot ekspertizasi tayinlanib, yetkazilgan jarohat og‘irlik darajasi aniqlanmoqda.
