Bir qator hududlarda hokimlar almashdi
5 ta viloyatda tuman-shaharlarga yangi hokimlar tayinlandi.
Toshkent viloyati hokimligi xabariga ko‘ra, Zoyir Mirzayev Ohangaron shahar hokimi lavozimiga tuman hokimining qurilish, to‘siqlarsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari vazifasida ishlab kelgan Sadriddin Shoqosimov nomzodini tavsiya qildi.
Xalq deputatlari Ohangaron shahar Kengashi Sadriddin Shoqosimovni shahar hokimi etib tasdiqladi.
Elyorbek Abdurahmonov Xonobod shahri hokimi etib tayinlandi. Ushbu lavozimga tayinlanguniga qadar u Andijon viloyati Kambag‘allikni qisqartirish va bandlik boshqarmasi boshlig‘i vazifasini bajaruvchi sifatida faoliyat olib borgan.
Shohrux Boltayev Navoiy viloyati Karmana tumani hokimi etib tayinlandi. Tayinlovga qadar u Karmana tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimida faoliyat yuritgan.
Shuningdek, Alisher Rashidov Navbahor tumani hokimi lavozimiga tayinlandi. Tayinlovga qadar u Navoiy viloyati Qishloq xo‘jaligi boshqarmasi boshlig‘i lavozimida faoliyat olib borgan.
Narpay tumaniga ham yangi hokim tayinlandi. Tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — Iqtisodiyot va moliya bo‘limi boshlig‘i vazifasida faoliyat yuritib kelayotgan Anvar Boliyev hokim etib tayinlandi.
