O‘zbekiston bo‘ylab tozalik oyligining 15 kunligida 243 ming tonna chiqindi olib chiqildi
Respublika bo‘ylab o‘tkazilayotgan tozalik oyligi doirasida 15 kunlik natijalar taqdim etildi.
O‘zbekiston bo‘ylab 15-oktabrdan 15-noyabrgacha o‘tkazilayotgan “Tozalik va ozodalik oyligi” doirasida dastlabki o‘n besh kunlik natijalar ma’lum qilindi. Yakunlarga ko‘ra, respublika hududlarida keng ko‘lamli obodonlashtirish va sanitariya tadbirlari amalga oshirilib, katta hajmdagi chiqindilar yig‘ishtirildi.
Tozalik aksiyasining ilk 15 kunida 19 ming nafardan ortiq sanitar tozalash va obodonlashtirish xizmati xodimlari ishtirok etdi. Shu davrda 32 099 ta mahalla hududi va 16 887 ta jamoat maskanlarida tozalash ishlari olib borildi. Jarayonlarga 28 937 dona maxsus texnika jalb qilinib, 243 278 tonna chiqindi yig‘ishtirildi va hududlardan chiqarib tashlandi.
Hududlarda tartib-intizomni kuchaytirish maqsadida Prokuratura, IIB, Milliy gvardiya va Ekologik davlat nazorat inspeksiyasi tomonidan nazorat tadbirlari o‘tkazildi. Belgilanmagan joylarga chiqindi tashlash va sanitariya qoidalarini buzish bilan bog‘liq 36 788 ta huquqbuzarlik aniqlanib, ularga qonunchilik asosida choralar ko‘rildi.
Tozalik tadbirlarida, shuningdek, 22,5 mingdan ziyod davlat tashkilotlari xodimlari hamda o‘ndan ortiq hamkor tashkilotlar vakillari faol ishtirok etdi.
Mazkur oylik doirasidagi ishlar yil yakuniga qadar izchil davom ettiriladi.
