Serbiyada terror tahdidi sabab poyezdlar harakati to‘xtatildi
Hozirda yo‘nalishlarda tekshiruv harakatlari olib borilmoqda.
Serbiya milliy yo‘lovchi temiryo‘l kompaniyasi mamlakat bo‘ylab barcha poyezdlar harakati vaqtincha to‘xtatilganini maʼlum qildi. Qaror kompaniya tomonidan “temiryo‘l yo‘laklari va poyezdlarda portlovchi qurilmalar joylashtirilgan” degan anonim xabar olinganidan so‘ng qabul qilingan.
“Yo‘lovchilar va xodimlar xavfsizligi biz uchun eng muhim ustuvorlikdir. Shu sababli, barcha yo‘nalishlardagi poyezdlar harakati xavfsizlik tekshiruvlari yakunlanguncha vaqtincha to‘xtatildi”, deyiladi temiryo‘l kompaniyasi rasmiy saytida.
Serbiya Ichki ishlar vazirligi bilan hamkorlikda butun temiryo‘l tarmog‘ida keng qamrovli tekshiruv ishlari olib borilmoqda. Hozircha portlovchi qurilmalar yoki real xavf aniqlangani haqida maʼlumot berilmagan.
Tahdid tufayli nafaqat ichki, balki xalqaro yo‘nalishlar ham to‘xtagan. Shu jumladan, Belgrad–Bar (Chernogoriya) liniyasida poyezd qatnovi bekor qilinib, yo‘lovchilar vaqtincha avtobuslar orqali tashilmoqda.
Rasmiylar yo‘lovchilarga rasmiy sayt va ijtimoiy tarmoqlari orqali so‘nggi yangiliklarni kuzatib borishni tavsiya qilmoqda.
