2 yillik urushdan so‘ng G‘azoda maktablar qayta ochilmoqda

Ikki yil davom etgan harbiy harakatlar va doimiy bombardimonlardan so‘ng G‘azo sektorida taʼlim jarayoni bosqichma-bosqich tiklanmoqda. BMTning Falastin qochqinlari bilan ishlovchi agentligining maʼlum qilishicha, ayrim maktablar qayta faoliyat boshlagan.

 

Oldingi urushlar davomida maktab binolarining katta qismi vayron bo‘lgan. UNRWA hisob-kitoblariga ko‘ra, sektordagi 564 ta maktabdan qariyb 518 tasi taʼmirtalab holatda. Shu bois ko‘plab darslar hozircha favqulodda sharoitlarda — boshpanalarda, ochiq maydonlarda yoki vaqtinchalik sinfxonalarda o‘tkazilmoqda.

 

Birinchi bosqichda o‘n minglab o‘quvchilar darslarga qaytdi. Bolalar uchun maktabga borish nafaqat taʼlim, balki urushdan keyingi ruhiy tiklanish va oddiy hayotga qaytish hissini berayotgani taʼkidlanmoqda. Biroq suv, elektr, jihozlar va darsliklar yetishmovchiligi, shuningdek xavfsizlik muammolari hali ham jiddiy to‘siq bo‘lib turibdi.

 

Mutaxassislar taʼlim tizimiga yetgan zararni “yo‘qolib ketayotgan avlod xavfi” bilan baholamoqda. O‘qituvchilar, infratuzilma va moliyaviy resurslar yetishmasligi sabab taʼlim jarayoni to‘liq va barqaror tiklanishi uchun hali vaqt talab etiladi.

 

Xalqaro tashkilotlar maktablarni qayta tiklash, o‘qituvchilarni tayyorlash va bolalarga psixologik yordam ko‘rsatish bo‘yicha loyihalarni amalga oshirmoqda. Tahlilchilarning fikricha, uzoq muddatli barqarorlik uchun xavfsizlik kafolatlari va doimiy insonparvarlik yordami zarur.