AQSHda neftni qayta ishlash zavodi portlab ketdi
Hozirda hodisa sabablari komissiya tomonidan o‘rganilmoqda.
Nyu-Meksiko shtatida joylashgan HF Sinclair neftni qayta ishlash zavodida 31-oktyabr kuni portlash sodir bo‘ldi. Hodisadan keyin zavod hududi ustida qora tutun ko‘tarilgani kuzatilgan. Portlash shaharning bir qancha qismlaridan ham eshitilgan.
Rasmiy maʼlumotlarga ko‘ra, halok bo‘lganlar yo‘q. Bir necha xodimlar yaralangan va tibbiy yordam olmoqda. Zavodning kunlik quvvati taxminan 100 ming barrel neftni qayta ishlashga teng.
Atrof-muhitni muhofaza qilish xizmati hodisa joyida havo sifati va odamlar salomatligi uchun xavf darajasini tekshirmoqda. Portlash sabablari maxsus komissiya tomonidan o‘rganilmoqda.
Mutaxassislar bu hodisa mamlakatda yoqilg‘i taʼminoti va narxlarga qisqa muddatli taʼsir ko‘rsatishi mumkinligini bildirmoqda.
