Bugundan Qatarda FIFA U-17 Jahon chempionati boshlanadi
Unda o‘zbekistonliklar Osiyo chempioni sifatida ishtirok etadi.
Bugundan Qatar yashil maydonlarida FIFA U-17 Jahon chempionati start oladi. Unda O‘zbekiston U-17 terma jamoasi Osiyo chempioni sifatida ishtirok etadi.
O‘zbekiston U-17 terma jamoasi o‘smirlar o‘rtasidagi Jahon chempionatlarida 4-bor ishtirok etmoqda. Jamoa 2011 (Meksika) va 2023-yilgi (Indoneziya) musobaqada chorak finalga qadar yetib borgan. 2013 yil Birlashgan Arab Amirliklarida o‘tgan mundialda esa 1/8 final bosqichida ishtirokini yakunlagan.
Bu galgi musobaqada Islombek Ismoilov boshqaruvidagi O‘zbekiston U-17 terma jamoasi Jahon chempionatining “J” guruhida Paragvay, Irlandiya va Panama o‘smirlar terma jamoalariga qarshi bahs olib boradi.
O‘zbekistonlik o‘smirlar “yurishlarini” 5 noyabr kuni boshlashadi. Dastlabki raqib Paragvay jamoasi. Paragvay ushbu yosh toifasidagi Jahon chempionatida 5 marta ishtirok etmoqda. Eng yaxshi natija 1999 va 2019 yillarga to‘g‘ri keladi. O‘shanda jamoa chorak finalga qadar yetib borgan.
8 noyabr kuni O‘zbekiston Irlandiyaga qarshi maydonga tushadi. Irlandiya ushbu yosh toifasida ilk marotaba JCHda ishtirok etishi.
Guruh bosqichidagi so‘ngi o‘yin esa Panama U-17 terma jamoasiga qarshi bo‘ladi. Ushbu o‘yin 11 noyabr kuniga belgilangan. Panamaning 17 yoshgacha bo‘lgan futbolchilar orasidagi Jahon chempionatida qayd etgan eng yaxshi natijasi 2011 yilga to‘g‘ri keladi. O‘sha yili jamoa 1/8 finalga qadar yetib borgan.
