Jizzaxda “Hududgaz” xodimi 6 ming dollar pora olayotganda ushlandi
U nosoz gaz hisoblagich bo‘yicha dalolatnomani bekor qilish evaziga tadbirkordan pul talab qilgan.
Jizzax shahrida “Hududgaz Jizzax” gaz ta’minoti filiali yetakchi mutaxassisi 6 ming AQSh dollarini olayotgan vaqtida Davlat xavfsizlik xizmati xodimlari tomonidan qo‘lga olindi.
Ma’lum bo‘lishicha, u tadbirkorlik subyekti faoliyatini tekshirish chog‘ida nosoz gaz hisoblagich aniqlab, bu bo‘yicha dalolatnoma tuzgan. Biroq keyinchalik o‘z xizmat mavqeidan foydalanib, ushbu dalolatnomani bekor qilish va tergovga qadar tekshiruv bo‘yicha jinoyat ishi qo‘zg‘atmaslik evaziga 6 ming dollar so‘ragan. Tezkor tadbir chog‘ida mutaxassis so‘ralgan pulni “Hududgaz Jizzax” filiali binosi oldida olayotganida ushbu jinoyat ustida ushlandi.
Tekshiruv natijalariga ko‘ra, gaz hisoblagich tashqi ta’sirsiz, tabiiy ravishda nosoz holatga kelgani aniqlangan. Hozirda unga nisbatan Jinoyat kodeksining 25,168-moddasi 3-qismi “v” bandi va 28,211-moddasi 1-qismi bo‘yicha jinoyat ishi qo‘zg‘atilib, tergov harakatlari davom etmoqda.
