“Mirzo Ulug‘bek vorislari” davlat dasturi doirasida Creative Tech loyihasi ishga tushirildi
2500 dan ortiq arizadan saralangan 800 nafar yoshlar 6 oy davomida 3D, Animatsiya, VFX, GameDev, Unreal Engine, Digital Art va boshqa kreativ yo‘nalishlarda bepul ta’lim oladi.
O‘zbekistonda zamonaviy kreativ industriya yo‘nalishlarida malakali mutaxassislar tayyorlashga qaratilgan Creative Tech o‘quv loyihasi start oldi. Loyiha “Mirzo Ulug‘bek vorislari” davlat grant dasturi doirasida tashkillashtirilib, yoshlarni raqamli iqtisodiyot va global kreativ bozor talablariga mos kadr sifatida tayyorlashni maqsad qilgan.
Loyihaga respublikaning turli hududlaridan 2500 dan ortiq arizalar kelib tushdi. Saralash bosqichlari yakuniga ko‘ra, 800 nafar iste’dodli yoshlar 6 oylik bepul ta’lim kursiga qabul qilindi. Ta’lim quyidagi 8 yo‘nalishni o‘z ichiga oladi:
- 3D Modellashtirish
- Animatsiya
- VFX Compositing
- FX Simulation
- Game Design va Game Development
- Unreal Engine
- Cinema 4D
- Digital Art
Mashg‘ulotlar o‘z sohasida katta tajribaga ega, xalqaro kinostudiyalar, o‘yin kompaniyalari va animatsiya markazlarida faoliyat yuritgan mentorlar tomonidan olib borilmoqda.
Creative Tech loyihasining asosiy maqsadi - O‘zbekiston yoshlarini global kreativ va raqamli bozor uchun raqobatbardosh mutaxassis sifatida tayyorlash, yangi kasblar orqali yoshlarning bandligini ta’minlash va yuqori daromadli faoliyatga yo‘naltirish, mahalliy animatsiya, kino va game-industriyaning rivojlanishiga hissa qo‘shish, yoshlarning startap tashabbuslarini qo‘llab-quvvatlash, ijodiy studiya va jamoalar shakllanishiga ko‘maklashish hisoblanadi.
Mazkur yo‘nalishlar bugungi kunda dunyo bo‘yicha eng talab yuqori sohalar sirasiga kiradi. 3D artistlar, animatorlar, o‘yin dizaynerlari, VFX mutaxassislari hamda Unreal Engine dasturchilarining xalqaro mehnat bozoridagi o‘rtacha daromadi $2 000 – $5 000 atrofida bo‘lib, onlayn freelancing hamda xalqaro kompaniyalarda masofadan ishlash imkoniyatlari kengaymoqda.
Kutilayotgan natijalar:
Loyiha yakuniga ko‘ra, ishtirokchilar:
- real loyihalarda ishtirok etgan amaliy portfelga ega bo‘ladi;
- mahalliy va xalqaro studiyalarda ishga joylashish imkoniyatiga ega bo‘ladi;
- eng faol yoshlar o‘z startaplarini yo‘lga qo‘yish, media kontent studiyalari yoki game/animatsiya jamoalarini shakllantirish imkoniyatiga ega bo‘ladi.
Creative Tech — bu shunchaki o‘quv kursi emas, balki yoshlarni xalqaro kreativ industriyaga integratsiya qilish, ularning salohiyatini ro‘yobga chiqarish, raqamli iqtisodiyot uchun yetuk kadrlar tayyorlashga xizmat qiluvchi strategik platformadir.
