Moskvada 12 mingdan ortiq immigratsiya qoidabuzarligi aniqlandi
2700 nafar xorijlikka nisbatan Rossiyadan ma’muriy chiqarib yuborish to‘g‘risida qaror qabul qilingan.
Rossiya poytaxtida “Nolegal-2025” tezkor-profilaktika tadbirining ikkinchi bosqichi doirasida migratsiya tartib-qoidalariga rioya etilishi bo‘yicha keng qamrovli tekshiruvlar o‘tkazildi. Bu haqda Rossiya Ichki ishlar vazirligi Moskva shahar bo‘yicha Bosh boshqarmasi matbuot xizmati rahbari Vladimir Vasenin ma’lum qildi.
Rasmiy ma’lumotlarga ko‘ra, reydlar davomida immigratsiya qonunchiligining 12 mingdan ortiq buzilishi aniqlangan. Shundan 8,3 mingdan ortiq xorijlik kirish-chiqish tartibini buzganlik uchun, 1000 nafardan ziyodi esa mehnat faoliyati qoidalariga amal qilmagani uchun ma’muriy javobgarlikka tortildi.
Shuningdek, xorijliklarni noqonuniy ravishda ishga qabul qilish bilan bog‘liq 1400 dan ortiq huquqbuzarlik aniqlanib, ish beruvchilarga nisbatan choralar ko‘rildi.
Tadbirlar jarayonida jamoat joylari, oziq-ovqat muassasalari, yotoqxonalar hamda qurilish obyektlarida keng ko‘lamli tekshiruvlar amalga oshirildi. Natijada federal darajada qidiruvda bo‘lgan yoki turli huquqiy choralar ko‘rilishi lozim bo‘lgan 155 nafar shaxs aniqlangan.
Tekshiruv yakunlariga ko‘ra, 2700 nafar xorijlikka nisbatan Rossiya Federatsiyasidan ma’muriy chiqarib yuborish to‘g‘risida qaror qabul qilingan, shundan 1300 nafardan ortig‘i vaqtincha saqlash izolyatorlariga joylashtirilgan, 803 nafar chet el fuqarosi davlat chegarasidan majburan olib chiqilgan, 43 nafari deportatsiya qilingan va qo‘shimcha ravishda 6000 nafar xorijlikning Rossiyaga kirishi taqiqlangan.
