Moskvada migrantlar o‘rtasida ommaviy janjal chiqdi
Politsiya hodisa ishtirokchilarini aniqlash bo‘yicha surishtiruv boshlagan, dastlabki ma’lumotlarga ko‘ra, to‘qnashuvda besh kishi qatnashgan.
2-noyabr kuni Rossiya poytaxti Moskvaning “Filatov lug” turar joy majmuasida migrantlar o‘rtasida navbatdagi ommaviy janjal yuz berdi. Bu haqda shahar Ichki ishlar bosh boshqarmasi matbuot xizmati ma’lum qildi. Voqea joyiga politsiya xodimlari yetib borib, holatni o‘rganish hamda ishtirokchilarni aniqlash bo‘yicha surishtiruv ishlarini boshlagan.
Guvohlarning so‘zlariga ko‘ra, janjal davomida migrantlar bir-biriga pichoq va hatto bolta uloqtirgan. Hodisani telefoniga yozib olayotgan erkaklardan birining bo‘yniga pichoq tiralgan va undan videoga olishni to‘xtatish talab qilingan, biroq u voqea joyidan sog‘-omon chiqib ketgan.
Politsiya ma’lumotiga ko‘ra, hodisa ishtirokchilari ichki ishlar bo‘limiga olib borilgan va ularning harakatlariga qonuniy baho beriladi. Dastlabki ma’lumotlarga ko‘ra, to‘qnashuvda taxminan besh kishi ishtirok etgan, ammo hozircha jabrlanganlar haqida xabar berilmagan.
Eslatib o‘tamiz, 25-oktabr kuni Moskvaning “Prokshino” turar joy majmuasida ham shunga o‘xshash ommaviy mushtlashuv bo‘lib o‘tgan edi. O‘shanda politsiya 80 dan ortiq kishini ushlab, 65 nafariga nisbatan ma’muriy bayonnoma tuzgan edi.
