O‘zbekistonda 9 oyda YTH sabab 1300 dan ortiq odam halok bo‘ldi
O‘tgan yilning shu davriga nisbatan yo‘l-transport hodisalari soni 3,8 foizga kamaydi.
2025-yilning yanvar–sentyabr oylari yakunlariga ko‘ra, respublika hududlarida 5 895 ta yo‘l-transport hodisasi sodir bo‘ldi. Bu ko‘rsatkich o‘tgan yilning mos davriga nisbatan 3,8 foizga kamdir. Bu haqda Oliy Majlis Senatining Mudofaa va xavfsizlik masalalari qo‘mitasi raisi Qutbiddin Burxonov ma’lum qildi.
Rasmiy statistika shuni ko‘rsatadiki, YTH oqibatida jarohat olganlar soni 4 759 nafardan 4 592 nafarga (3,5 foizga) kamaygan. Halok bo‘lganlar soni ham 1 368 nafardan 1 303 nafarga pasayib, 4,8 foizlik qisqarish qayd etilgan.
Piyodalar ishtirokida sodir bo‘lgan yo‘l-transport hodisalari ham kamayish tendensiyasini ko‘rsatmoqda — hisobot davrida ular 2 855 tadan 2 689 taga tushgan (5,8 foizga).
Mazkur ko‘rsatkichlar YTHlar dinamikasida ijobiy o‘zgarishlar kuzatilayotganini bildiradi. Shu bilan birga, Senat qo‘mitasi aholining yo‘l harakati qoidalariga rioya etishini kuchaytirish, profilaktika va xavfsizlik choralarini yanada samarali davom ettirish zarurligini ta’kidladi.
