Rossiyada mehnat migrantlari uchun patent narxi oshiriladi
2026-yildan patent narxi 8 900 rubl dan 10 000 rublgacha oshirilishi rejalashtirilmoqda.
Moskva shahrida mehnat migrantlari uchun patent (ishlash ruxsatnomasi) qiymatini oshirish rejalashtirilmoqda, deb xabar bermoqda “TASS”.
Ma’lumotga ko‘ra, 2026-yildan boshlab patent narxi amaldagi 8 900 rubldan 10 000 rublgacha ko‘tarilishi kutilmoqda. Bu haqda Moskva shahar Dumasining Iqtisodiy siyosat va ijtimoiy-iqtisodiy rivojlanish qo‘mitasi yig‘ilishida shahar Iqtisodiy siyosat va rivojlanish departamenti rahbari o‘rinbosari, Soliq tahlili boshqarmasi boshlig‘i Daria Murchenko ma’lum qilgan.
Taqdim etilgan taklifga ko‘ra, mintaqaviy koeffitsient 2,9323 miqdorida belgilanishi rejalashtirilgan. Ushbu o‘zgarish to‘lov stavkasining oshirilishiga asos yaratadi.
Murchenkoning qayd etishicha, patent narxining ko‘tarilishi mehnat migrantlarining soliq yukini Rossiya fuqarolariniki bilan muvofiqlashtirishga xizmat qiladi.
Patent narxi uchta tarkibiy qismdan shakllanadi:
- Soliq kodeksida belgilangan bazaviy qiymat;
- Iqtisodiy rivojlanish vazirligi tomonidan har yili tasdiqlanadigan federal deflyator koeffitsienti;
- Mintaqaviy koeffitsient.
