Tramp Nigeriyaga qo‘shin yuborishi mumkin
AQSh prezidenti Nigeriyadagi vaziyatni keskin tanqid qilib, Mudofaa vazirligiga ehtimoliy harbiy choralar bo‘yicha tayyorgarlik ko‘rsatmasi berganini ma’lum qildi.
AQSh prezidenti Donald Tramp Nigeriya hukumatini mamlakatda nasroniy aholiga nisbatan sodir etilayotgan zo‘ravonliklarni to‘xtatishga chaqirdi. Uning ta’kidlashicha, vaziyat bartaraf etilmasa, Amerika hukumati Nigeriyaga ko‘rsatilayotgan yordamni darhol to‘xtatishi mumkin.
Tramp o‘z bayonotida Nigeriya hukumatining nasroniylarga qarshi hujumlarga yetarli darajada munosabat bildirmayotgani haqida qayd etgan. “Agar hukumat nasroniylar o‘ldirilishiga ko‘z yumishda davom etsa, AQSh barcha yordamni bekor qiladi va zarurat tug‘ilganda, islom radikallari tahdidini bartaraf etish uchun qo‘shin yuborishni ko‘rib chiqadi”, — deyiladi bayonotda.
AQSh rahbari Nigeriyada shakllangan vaziyatni “keskin choralarni talab qilayotgan jiddiy muammo” deb atadi. Shuningdek, u Mudofaa vazirligiga ehtimoliy harbiy amaliyotga tayyorgarlik ko‘rish bo‘yicha ko‘rsatmalar berganini ma’lum qildi.
