Andijonda bojxona xodimining hujjatini soxtalashtirgan shaxslar ushlandi
Ular soxtalashtirilgan hujjat va ma’lumotnomalar orqali bankdan kredit olishga uringan.
Andijonda bankdan kredit olish maqsadida bojxona xodimiga oid soxtalashtirilgan hujjat va ma’lumotnoma tayyorlagan shaxslar qo‘lga olindi. Bu haqda Davlat bojxona qo‘mitasi xabar berdi.
Ma’lum bo‘lishicha, bojxona qo‘mitasi hamda Andijon viloyati va Toshkent shahar bojxona boshqarmalari tezkor tuzilmalari tomonidan o‘tkazilgan tadbirda, bir guruh shaxslar tomonidan soxtalashtirilgan hujjatlar tayyorlash holatiga chek qo‘yilgan. Tekshiruv davomida yashash xonadonida “O‘zbekiston Respublikasi Davlat bojxona qo‘mitasi Kadrlar boshqarmasi” yozuvi tushirilgan muhr, ish haqi to‘g‘risidagi ma’lumotnomalar, shuningdek, soxta bojxona xodimi guvohnomasi va boshqa hujjatlar topilgan.
Aniqlanishicha, uch kishidan iborat guruh soxta hujjatlar yordamida hududlardagi banklarga kredit olish uchun murojaat qilgan. Ular muhr bosilgan ma’lumotnoma va xizmat guvohnomalari orqali o‘z harakatlarini yashirishga harakat qilgan.
Hozirda mazkur holat yuzasidan tergovga qadar tekshiruv harakatlari olib borilmoqda. Eslatib o‘tamiz, avvalroq Toshkent shahrida o‘zini Prezident Administratsiyasi yoki DXX xodimi sifatida tanishtirib, hujjatlarni soxtalashtirgan shaxs qo‘lga olingan edi.
