Farg‘onada 4 kishining o‘limiga sababchi bo‘lgan haydovchi 8 yilga qamaldi
Shuningdek, haydovchiga halok bo‘lganlar oilasiga 100 million so‘m miqdorida tovon puli to‘lash majburiyati yuklandi.
Farg‘ona viloyatida bir oilaning to‘rt nafar a’zosi hayotdan ko‘z yumishiga sabab bo‘lgan yo‘l-transport hodisasi yuzasidan sud hukmi e’lon qilindi. Jinoyat ishi bo‘yicha ayblanuvchi — 25 yoshli haydovchi aybdor deb topilib, ozodlikdan mahrum etildi. Bu haqda sudning rasmiy axborotida ma’lum qilindi.
Voqea Farg‘ona tumanidagi “Shohimardonobod” mahallasida sodir bo‘lgan. Dastlabki tergov materiallariga ko‘ra, Nexia avtomobili haydovchisi belgilangan tezlik me’yorlarini qo‘pol ravishda buzgan holda, qarama-qarshi yo‘lakka chiqib xavfli quvib o‘tish manevrini amalga oshirgan. Natijada u Tico avtomobili bilan yuzma-yuz to‘qnashgan.
To‘qnashuv oqibatida Tico haydovchisi hodisa joyida halok bo‘lgan. Transport vositasida bo‘lgan ayol va ikki nafar voyaga yetmagan bola og‘ir tan jarohatlari sabab shifoxonada vafot etgan. Nexia haydovchisi esa tirik qolgan.
Sud hukmiga ko‘ra, aybdor haydovchi 8 yil muddatga ozodlikdan mahrum etildi hamda 3 yil davomida transport vositasini boshqarish huquqidan mahrum qilindi. Shuningdek, sud halok bo‘lganlar oilasiga 100 million so‘m miqdorida tovon puli to‘lash majburiyatini yukladi.
