“Kelajak merosi” xalqaro mukofoti ta’sis etiladi
Mukofot har yili adabiyot, madaniy meros, san’at, ilm-fan va raqamli texnologiyalar yo‘nalishlarida topshiriladi.
2025-yil 3-noyabr kuni Prezidentning PQ–330-son qarori bilan “Kelajak merosi” xalqaro mukofotini ta’sis etish to‘g‘risidagi qaror imzolandi. Qarorga muvofiq, ushbu mukofot san’at, madaniyat va ilm-fan sohalarida yuksak yutuqlarga erishgan shaxs va jamoalarni rag‘batlantirish maqsadida joriy etiladi.
“Kelajak merosi” xalqaro mukofoti uchun tanlovlar 2025-yildan boshlab har yili o‘tkaziladi. U quyidagi yo‘nalishlarni o‘z ichiga oladi: adabiyot, madaniy meros, teatr va kino, musiqa va raqs, tasviriy va amaliy san’at, moda va dizayn, shuningdek, ilm-fan, ta’lim hamda raqamli texnologiyalar.
Mukofotning har bir yo‘nalishida g‘oliblarga statuetka, diplom va 10 ming AQSh dollari miqdoridagi bir martalik pul mukofoti topshiriladi. G‘oliblarni taqdirlash marosimi tantanali tarzda o‘tkazilishi rejalashtirilgan.
